Bøtur fyri brot á Fuglaveiðulógina

Skrivað av Janus Hansen

Mánadagur, 14 September 2009 00:00

Grágás á trøð.

Tað eru helst nógv sum als einki kenna til Fuglaveiðulógina og onnur, sum einki leggja í hana. Tíbetur verða fólk tikin fyri brot á lógina, og fáa bót hareftir.

Í Fuglaveiðulógini er ásett, at øll sløg eru friðaði, við nøkrum undantøkum. Undantøkini eru

Alt árið

Kráku, ravn, kjógva, skúgv, havhest, súlu og øll másasløg, tó ritu bert á sjónum

1. oktober – 20. januar

Lunda, lomviga og álku

1. oktober – 30. november

Skarv

Eisini er ásett hvør avleiðingin er fyri brot á lógina. Um sektir og ákæru verður m.a. sagt, at

Undir sekt kemur eisini hann, sum annars brýtur nakra forboðsreglu eftir hesi lóg
ella nakra samtykt ella reglu sum gjørd er eftir henni, og harafturat kemur
byrsa og fongur undir konfiskatión.

Eg havi kanna hvørjar bøtur hava verið lætnar í síðstuni fyri brot á Fuglaveiðilógina.

2007

10 Grágæs í Kollafirði. Bót: 5.000 kr.
1 Skotin æða í Viðoy. Bót: 1.000 kr.
2 æður í dunnnugarði í Skopun. Bót: 2.000 kr.

2008

18 grágæs í Rituvík. Bót uppá 10.000 kr.
1 havgás skotin 19. januar 2008 í Vági. Bót: 1.000 kr.

Sostatt sæst, at bótin fyri hvønn fuglin er 500 - 1.000 kr. Sambært lógini eigur eisini hald at vera lagt á veiðureiðskapin, men í fleiri føri er talan um grágæs, sum ikki verða skotnar, men sum vera tiknar úr haganum og gøddar heima.

Tað stendur at

Mál um misbrot eftir hesi lóg, fara fram sum løgreglumál og fremjast, sjálvt um eingin hevur kravt tað.

Men eg kenni bara dømir um at brot á lógina fáa avleiðingar tá onkur hevur meldað. Og tí er hetta eisini ein áheitan á teg um at boða frá tá kennir til okkurt brot á Fuglaveiðulógina. Royn av avmynda tað sum er viðkomandi, eitt nú deyðan fugl. Boða frá hjá nærmastu Løgreglustøð og bið um at fáa kvittan fyri fráboðanina (so tú fært saksnummar og kann spyrja eftir tí). Tú kanst eisini siga Fuglafrøðifelagnum frá og so royna vit at gera nakað við tað.

Fuglaveiðulógin

Dømi um brot á Fuglaveiðulógina

Les eisini

Føroya Fuglafrøðifelag